المقادير
المكونات رقم 1
- كاس فرينة
- كاس سكر عادي
- كاس زيت
- 3بيضات ( نحتاج 2 حبات كاملين + 1 بياض و صفار نحتفظو بيه للطلاء)
- 1 خميرة كيميائية
- 1 ملعقة كبيرة خميرة الخبز
- 2 ملاعق كبار ماء الزهر
- 2 كؤوس حليب دافي
المكونات رقم 2
- كمية من الفرينة تصل تقريبا من 800غ الى كيلو
- ملح
للتزيين
- نباج او لاجيلي اذا ماتوفرش نقدر نستعمل المربى
- شوكولا
- سكر رطب او جوز هند
التحضير
- في خلاط كهربائي ( mixeur) ندير المكونات رقم 1 و نخلط مليح مدة 5د تقريبا حتى تمتزج كل المكونات نفرغها في ليان كبير و نخليها ترتاح مدة 10الى 15 د حتى تختمر ( تشبه طريقة عمل عجينة 10 دقائق)
- من بعد نضيف المكونات رقم 2 و نخلط الكل مع بعض ( لازم ماتكثريش الفرينة حتى يجي البريوش خفيف ماشي معلك برك قيس ماتتلم ) نغطيها و نخليها تخمر على جهة في مكان دافي
- كي تخمر ندي صينية او كيما تحبي تشكليها انا خترت هدي القوالب و صينية كبيرة تدهنيهم و ترشيهم بالفرينة و نشكل كريات كل وحدة ندير داخلها حبة شوكولا و نطليها بصفار البيضة + قليل من القهوة الداكنة او سريعة الذوبان و نزيد نخليها تختمر
- بعدما تخمر ندخلها الفرن يكون ساخن من قبل و نخليها حتى تدي اللون الذهبي
- كي نخرجها نطليها بلاجيلي او مربى المشمش او فراولة كيما تحبي انا هنا طليتها بلاجيلي نتاع سفرجل
- من بعد نرش عليها السكر رطب او جوز الهند وهذا هو شكلها النهائي
ملاحظة
- هذا النوع من العجينة يجي يلتصق كي نروح نشكل الكريات يغلبنا شوية املا كل مرة قبل ماتشكلي كرية اغطسي يديك في ماء عادي
- الكاس اللي نعبر بيه الفرينة نفسو نعبر بيه السكر و الزيت و الحليب
- تقدري تستغناي على الشوكولا في الحشو و تعوضيها بالجلجلان المحمص المدقوق و تضيفيه مع المكونات رقم 2